गोव्याच्या तानाजी सावंत व पीटर तेलीस यांनी योनेक्स सनराईज खिल भारतीय मास्टर्स मानांकन बॅडमिंटन स्पर्धेत ६० वर्षांखालील पुरुष दुहेरीच्या उपांत्यपूर्व फेरीत प्रवेश केला आहे. गोवा बॅडमिंटन संघटनेने अखिल भारतीय बॅडमिंटन महासंघाच्या मार्गदर्शनाखाली आयोजित या स्पर्धेतील सामने पेडे येथील बहुउद्देशीय सभागृहात खेळविण्यात येत आहेत. पीटर व तानाजी यांनी काल गुजरातच्या अरुण कौल व आनंद थिरानी यांचा २१-१२, २१-११ असा पराभव केला. गोव्याची ही जोडी पदक मिळविण्यापासून केवळ एका विजयाच्या अंतरावर आहे. तानाजी यांनी ६५ वर्षांवरील पुरुषांच्या उपांत्यपूर्व फेरीत प्रवेश करताना महाराष्ट्राच्या तृतीय मानांकित प्रधान चंद ठाकूर यांचा २१-१७, १७-२१, २१-१९ असा पराभव करत दिल्लीच्या कुट्टीपरंबिल विजय कुमार यांच्याशी गाठ पक्की केली.
५५ वर्षांवरील गटात गोव्याच्या मनीष पटेल व सुरेंद्र कामत यांनी उपउपांत्यपूर्व फेरीत स्थान मिळविले. ‘अंतिम ३२’ फेरीत त्यांनी मध्य प्रदेशच्या प्रमोद कुमार गुप्ता व रवींद्र हामे यांना २१-१३, २१-१४ असे पराभूत केले. याच गटात गोव्याच्या अशोक मेनन व रुपचंद्र हुम्रसकर यांनी माधव नारेगळकर व राजेश रामरखियानी या महाराष्ट्रच्या जोडीला २१-१२, २१-१६ असे पराजित करत आगेकूच केली. मलेशियन आंतरराष्ट्रीय मास्टर्स फेस्टिव्हल स्पर्धेत रौप्य पदक जिंकलेल्या जेफ्री डिसोझा व प्रदीप धोंड यांचा ६५ वर्षांवरील दुहेरीच्या उपांत्य फेरीत बलबीर सिंग जामवाल व अनिल मेहरोत्रा या तिसर्‍या मानांकित जोडीशी सामना होणार आहे. मिगेल रेगो व रिचर्ड डिसोझा यांच्यासमोर शशिधरा ए. व एस.के. बी. नायडू ही अव्वल मानांकित जोडी असेल. ६५ वर्षांवरील एकेरीत गोव्याच्या मिगेल रेगो यांना महाराष्ट्राच्या शौकत नूर मोहम्मद यांनी २१-७, २१-४ असे पराभूत केले.
